Rossiyaning turli hududlarida qarovsiz qolgan yana 6 nafar bola O‘zbekistonga qaytarildi. Bu haqda bolalar ombudsmani xabar berdi.

Xabarga ko‘ra, bolalar ombudsmani Rossiyadagi hamkasbiga murojaat yo‘llab, qarovsiz qolgan voyaga yetmaganlarni ular turgan hududlardagi bolalar muassasalariga vaqtincha joylashtirishda tezkor amaliy yordam so‘ragan. Rossiya bolalar ombudsmani tomonidan zarur ko‘mak choralari ko‘rilib, bolalar uchun barcha zarur shart-sharoitlar ta’minlangan.

Natijada 8-fevral kuni keyingi guruh — 6 nafar bola (ularning 4 nafari Moskva shahridan, 2 nafari Moskva viloyatidan) Ichki ishlar vazirligi mas’ullari hamrohligida O‘zbekistonga olib kelingan.

Hozirda bolalar Toshkent shahar IIBB Huquqbuzarlik profilaktikasi boshqarmasining Voyaga yetmaganlarga ijtimoiy-huquqiy yordam ko‘rsatish markaziga vaqtincha joylashtirilgan. Ijtimoiy himoya milliy agentligi tomonidan ularning yaqin qarindoshlari vasiyligini qonuniy tartibda rasmiylashtirish choralari ko‘rilmoqda.

• Bolalar
• IIV
• Rossiya