Joriy yil 21-mart kuni Samarqand shahrida U.t. ismli 21 yashar qiz Bag‘dod ko‘chasidagi xonadoni oldida tanishi X.I. ismli 21 yashar yigit tomonidan kaltaklandi. Bu haqda “Ezgulik” jamiyati ma’lum qilmoqda.

Olingan tan jarohatlari natijasida qiz shifoxonaga yotqizilgan.

Qizning onasi zo‘ravon yigitning qiziga uylanish maqsadida bir necha yildan beri harakat qilib kelgani, ammo yigitning tarbiyasi va yurish-turishi sabab bu ish amalga oshmaganini ma’lum qilgan.

O‘zbekiston inson huquqlari “Ezgulik” jamiyati zo‘ravonlikda gumon qilinayotgan yigitning Oliy Majlis Senati a’zosi, Samarqand davlat universiteti rektorining qarindoshi – jiyani ekanligini aytmoqda.

Holat yuzasidan Samarqand viloyati IIB Matbuot kotibi Jahongir Sa’dullayev yuqoridagi holatni tasdiqlab, holat viloyat IIB nazoratiga olinganini ma’lum qilgan. 

Hozirda Samarqand shahri bo‘yicha IIO FMB 4-sonli IIB tomonidan tergovga qadar tekshiruv harakatlari olib borilmoqda Tanishidan jabrlangan qizga himoya orderi berilgan.

• IIB
• Jinoyat
• Samarqand
• “Ezgulik” jamiyati