Senegalda muxolif siyosatchilar va hukmron partiya o‘rtasidagi qarama-qarshilik qonun chiqaruvchi organdagi to‘qnashuvga aylanib ketdi. Bu haqda “Reuters” xabar tarqatdi.

Joriy yilning 1-dekabr kuni Senegal parlamentida muxolifatdagi deputatlardan biri hukmron koalitsiyadagi ayol hamkasbiga tarsaki tushirganidan so‘ng ommaviy janjal boshlandi.

Afrika mamlakati muxolif siyosatchilari va hukmron partiya o‘rtasidagi qarama-qarshilik Senegal prezidenti Makki Sallning go‘yoki 2024-yilda uchinchi muddatga saylanish niyatida ekanligi bilan bog‘liq.

Muxolifat fikricha, amaldagi prezident bunday qadami bilan avvalroq bergan vaʼdasini buzgan bo‘ladi. 60 yoshli Sall tarafdorlari u konstitutsiyaga kiritilgan o‘zgartirish tufayli yana nomzodini qo‘yishi mumkinligini aytishmoqda.

Muxolifatchi deputat Massata Samb parlamentda so‘zlagan nutqida mamlakatning ruhiy yetakchisi prezidentning uchinchi muddatga saylanishiga qarshi ekanligini va uni tanqid qilganlar ruhoniyni haqorat qilishini eslatdi.

Hukmron koalitsiya deputati Emi Ndiaye Gnibia bu so‘zdan so‘ng kulib yuborgan. Muxolifatchi bunga chiday olmagan va hamkasbiga yaqinlashib, uning yuziga shapaloq tushurgan. Bu boshqa deputatlar o‘rtasidagi mushtlashuvning boshlanishi bo‘ldi.

Siyosatchilarning o‘zaro mushtlashuv, ayblovlar va haqoratlari sabab parlament majlisini to‘xtatishga to‘g‘ri keldi.

Mushtlashuv tasvirlari ijtimoiy tarmoqlarda tarqaldi va ayollarga nisbatan zo‘ravonlik haqida muhokamalarga sabab bo‘ldi.

• Parlament
• Prezident
• Senegal