Dubay shahridagi BMTning Iqlim o‘zgarishi bo‘yicha konferensiyasida O‘zbekiston Respublikasi Prezidenti Shavkat Mirziyoyev Indoneziya Prezidenti Joko Vidodo bilan uchrashdi.

Ikki mamlakat o‘rtasidagi ko‘p qirrali munosabatlarni yanada rivojlantirish va chuqurlashtirishning dolzarb masalalari muhokama qilindi.

Barcha darajalardagi o‘zaro muloqotlarning bugungi holati va ikki tomonlama savdodagi ijobiy sur’at mamnuniyat bilan qayd etildi.

Samarali hamkorlikni, shu jumladan iqtisodiy sohada “yo‘l xaritasi”ni qabul qilish orqali kengaytirish bo‘yicha o‘zaro muvofiqlashgan choralarni davom ettirishdan ikkala tomon ham manfaatdor ekani ta’kidlandi.

O‘zbekiston Respublikasi Prezidenti Shavkat Mirziyoyev 1-dekabr kuni Dubay shahriga amaliy tashrif doirasida Hindiston Respublikasi Bosh vaziri Narendra Modi bilan uchrashdi.

Ikki mamlakat o‘rtasidagi ko‘p qirrali va o‘zaro manfaatli hamkorlikni yanada rivojlantirish masalalari ko‘rib chiqildi.

Kommunikatsion texnologiyalar, farmatsevtika, fan va ta’lim, sog‘liqni saqlash, an’anaviy tibbiyot va yoga sohalarida hamkorlikni chuqurlashtirish va qo‘shma dasturlarni amalga oshirishga alohida e’tibor qaratildi.

O‘zbekiston Respublikasi Prezidenti Shavkat Mirziyoyev 1-dekabr kuni Turkiya Prezidenti Rejep Tayyip Erdog‘an bilan uchrashdi.

Suhbat Dubay shahrida o‘tayotgan BMTning Iqlim o‘zgarishi bo‘yicha konferensiyasi doirasida bo‘lib o‘tdi.

Keng ko‘lamli strategik sheriklikni yanada kengaytirish va qo‘shma investitsiya loyihalarini ilgari surish borasidagi dolzarb masalalar muhokama qilindi.

Ilgari oliy darajada erishilgan kelishuvlarni amalga oshirishga alohida e’tibor qaratildi.

Bo‘lajak oliy darajadagi tadbirlar rejasi, shu jumladan O‘zbekiston-Turkiya Strategik hamkorlik kengashining navbatdagi yig‘ilishini o‘tkazish masalalari ko‘rib chiqildi.

• BAA
• BMT
• Shavkat Mirziyoyev
• Xavfsizlik