Sirdaryo viloyatining Guliston tumanida chiyabo‘ri 4 nafar fuqaroga hujum qildi. Ma’lum qilinishicha, hodisa soat taxminan 17:30 larda tumanning “Ishonch” mahallasi dala chetiga yaqin hududda sodir bo‘lgan.

Voqea vaqtida mahallada yashovchi fuqarolardan biri tezkor choralar ko‘rib, yovvoyi hayvonni zararsizlantirgan va xavfning oldi olingan.Hujum oqibatida jabrlangan 4 nafar fuqaroga zudlik bilan tibbiy yordam ko‘rsatilgan. Hozirda ular shifokorlar nazorati ostida bo‘lib, ahvoli qoniqarli ekani bildirilmoqda.

Mazkur hodisa yuzasidan tegishli tashkilotlar tomonidan o‘rganish va profilaktik tadbirlar olib borilmoqda. Vaziyat mas’ul idoralar nazoratida.