Epsteyn ayollar savdosi bo‘yicha xalqaro tarmoq tuzgan — OAV

Marhum moliyachi Jeffri Epsteyn 2009-yilda qamoqdan chiqqanidan so‘ng ayollarni jinsiy ekspluatatsiya qilishni to‘xtatmagan, aksincha ularni yollash va tashish bo‘yicha xalqaro tarmoq tashkil etgan. Bu haqda Bloomberg AQSH Adliya vazirligi hujjatlariga tayanib xabar berdi.

Ma’lum qilinishicha, 2009–2019-yillar oralig‘ida Epsteyn xodimlari 3 700 dan ortiq tijoriy aviaqatnovni bron qilgan. Parvozlarning asosiy qismi Sharqiy Yevropa shaharlarini Parij, Nyu-York va AQSHning Virjiniya orollaridagi Litl-Sent-Jeyms oroli bilan bog‘lagan.

Surishtiruvga ko‘ra, Epsteyn Rossiya, Ukraina, Polsha, Boltiqbo‘yi davlatlari va Braziliyada model agentliklari niqobi ostida yosh ayollarni yollash tizimini yo‘lga qo‘ygan. Mutaxassislar ushbu sxema xalqaro odam savdosi tarmog‘i belgilariga mos kelishini ta’kidladi.

Shuningdek, surishtiruvda parvozlarni tashkil etish va vizalarni rasmiylashtirish uchun turli vositachilar xizmatidan foydalanilgani qayd etilgan. Bloomberg ma’lumotiga ko‘ra, bu faoliyat Epsteyn 2019-yilda hibsga olinguniga qadar davom etgan.