Bosh prokuratura huzuridagi Departamentning Buxoro viloyati boshqarmasi va hududiy bo‘limlari tomonidan o‘tkazilgan tezkor tadbirlarda “H.B.” oilaviy korxonasi, YATT “H.J.”, “R.D.” va “D.T.” hamda “M.O.” MChJlarga tegishli savdo do‘konlarida turli nomdagi jami 848 dona qalbaki aksiz markali alkogol mahsulotlari sotuvga qo‘yilganligi aniqlanib, ushbu mahsulotlar ashyoviy dalil sifatida olingan.

Shuningdek, Departamentning Sho‘rchi tumani bo‘limi tomonidan o‘tkazilgan tezkor tadbirda fuqaro J.Y.ga tegishli savdo do‘konidan umumiy bahosi 23 mln so‘mlik jami 511 dona tegishli hujjatlari bo‘lmagan hamda qalbaki aksiz markali alkogol mahsulotlari ashyoviy dalil sifatida olingan.

Bu haqda O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti axborot xizmati xabar berdi.

Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq, O‘zbekiston Respublikasining Istanbul shahridagi Bosh konsulxonasi tomonidan qalbaki spirtli mahsulotlarni iste’mol qilish natijasida Turkiyada 17 nafar o‘zbekistonliklar vafot etganligi haqida xabar berilgan edi.

• Alkogol
• Buxoro
• Prokuratura
• Surxondaryo
• qalbaki