Eron mamlakatdagi kuchli qurg‘oqchilik tufayli Tehron aholisiga suv yetkazib berishni cheklay boshladi.

Bu haqda mahalliy OAVlar xabar bermoqda.

“Bu suv isrofgarchiligining oldini olishga yordam beradi, garchi u biroz noqulaylik tug‘dirsa ham”, – degan Eron energetika vaziri Abbos Aliobodiy.

Eron matbuotiga ko‘ra, shanbaga o‘tar kechasi Tehronning turar-joylarida suvning vaqti-vaqti bilan uzilishi allaqachon boshlangan.

Eronning Haft-e Sobh gazetasining qayd etishicha, tarmoq bosimining pasayishi, yer usti va yer osti suvlari zaxiralarining kamayishi Tehron suv ta’minotida “jiddiy beqarorlik”ga sabab bo‘lgan.

Avvalroq Eron prezidenti Mas’ud Pezeshkiyon suv inqirozi tufayli Tehronning evakuatsiya qilinishini istisno qilmasligini aytgan edi. “Eron tabiiy muammolarga duch kelmoqda - yog‘ingarchilikning etishmasligi va suv resurslarining kamayishi og‘ir oqibatlarga olib keladi”, – degan Pezeshkiyon.

Davlat rahbari “yaqin kelajakda yomg‘ir yog‘masa, kelasi oydan boshlab Tehronda suv ta’minotiga qattiq cheklovlar joriy etishga majbur bo‘lamiz. Yomg‘ir bo‘lmasa, zaxiralarimiz tugaydi va biz shaharni evakuatsiya qilishga majbur bo‘lamiz”, — deya qo‘shimcha qilgan u.

Eronda so‘nggi besh yil ichida yog‘ingarchilik doimiy ravishda kamaygan. Mahalliy meteorologiya xizmatlari ma’lumotlariga ko‘ra, bu yil Tehronga mavsumiy o‘rtachadan 40 foizga kam yomg‘ir yog‘gan. Bahor va yozda yomg‘irning deyarli yo‘qligi suv omborlaridagi suv sathining keskin pasayib ketishiga olib kelgan.

• Eron
• Ichimlik suvi
• Tehron
• cheklov