Davlat xavfsizlik xizmati xabariga ko‘ra, Toshkent viloyatida ekologiya bo‘limi boshlig‘i va hokimlik mansabdori, Namangan viloyatida esa hokim yordamchisi pora ortidan ushlanib, jinoyat ishlari qo‘zg‘atilgan.

Toshkent viloyati hokimligining “Yagona buyurtmachi xizmati” davlat muassasasi direktori o‘rinbosari o‘z xizmat mavqeyidan foydalangan holda, “Shaffof qurilish” milliy axborot tizimi orqali shartnoma qiymati 2 milliard 73 million so‘m bo‘lgan obyektni kapital ta’mirlash bo‘yicha g‘olib bo‘lgan pudratchi tashkilot hisob raqamiga bo‘nak sifatida 1,1 milliard so‘m mablag‘ o‘tkazib bergani evaziga muqaddam MCHJ rahbaridan tamagirlik yo‘li bilan 2 ming AQSh dollari olgan.

Shuningdek, u jinoiy harakatini takroran davom ettirib, pudratchi tashkilot tomonidan qurilish ishlari belgilangan muddatlarda bajarilmagani sababli, undan 643 mln 530 ming so‘m penya undirish bo‘yicha Toshkent tumanlararo iqtisodiy sudiga kiritilgan da’vo arizasidan voz kechish orqali MChJ foydasiga ajrim chiqartirib bergani evaziga 5 ming AQSh dollarini pora tariqasida olgan vaqtida DXXning Toshkent viloyati bo‘yicha boshqarmasi xodimlari tomonidan qo‘lga olingan.

Toshkent viloyati Ekologiya va atrof muhitni muhofaza qilish boshqarmasining tumanlardan biridagi bo‘limi boshlig‘i 1990-yilda tug‘ilgan fuqaro tomonidan o‘zi istiqomat qiluvchi uyning ko‘cha qismida qurilish ishlarini amalga oshirish maqsadida ko‘p yillik daraxtlarni kesib tashlashi uchun ruxsat berish evaziga 3 ming AQSh dollarini pora tariqasida olgan vaqtida ashyoviy dalillar bilan ushlangan. Mazkur rahbar xodimga nisbatan Jinoyat kodeksining 210-moddasi 1-qismi bilan jinoyat ishi qo‘zg‘atilib, qamoq ehtiyot chorasi qo‘llangan.

Namangan viloyatida kuzatilgan holatda esa Pop tumanidagi mahalla fuqarolar yig‘inlaridan biridagi hokim yordamchisi davlat zaxirasidagi 90 sotix yer maydonini tadbirkorlik bilan shug‘ullanmoqchi bo‘lgan shaxsga kelgusida to‘yxona qurishi uchun olib berish va tegishli hujjatlarini tayyorlatib berish evaziga 2025-yilda 4500 AQSh dollari olgan. Ammo muqaddam sudlangan hokim yordamchisi va’da qilingan ishni bitira olmagach, 4500 AQSh dollari hisobidan 1 mln 200 ming so‘mni qaytarib bergan vaqtida DXX va Bosh prokuratura huzuridagi departament xodimlari tomonidan ushlangan. Hozirda unga nisbatan Jinoyat kodeksining 168-moddasi 3-qismi “a, v” bandlari bilan jinoyat ishi qo‘zg‘atilib, tergov harakatlari olib borilmoqda.

• Namangan
• Pora
• Toshkent viloyati