Davlat xavfsizlik xizmati ma’lum qilishicha, Toshkent viloyati va Qoraqalpog‘iston Respublikasida ruxsatnoma olish hamda nafaqa tayinlash bilan bog‘liq korrupsion holatlar aniqlangan.

Toshkent viloyatida tuman maktabgacha va maktab ta’limi bo‘limi metodisti fuqarodan oilaviy bog‘cha ochish uchun sanitariya talablari bo‘yicha ruxsatnoma tayyorlab berish evaziga 1,5 mln so‘m hamda yong‘in xavfsizligi bo‘yicha ijobiy xulosa olish uchun 200 AQSH dollari talab qilgan. U pul mablag‘larini olayotgan vaqtida ashyoviy dalillar bilan qo‘lga olingan.

Tezkor tadbir davomida undan 200 dollar olgan tuman Favqulodda vaziyatlar bo‘limi katta inspektorining ham noqonuniy harakatlariga chek qo‘yilgan.

Qoraqalpog‘iston Respublikasining Chimboy tumanida yashovchi ayol boshqa bir fuqaroga yoshga doir nafaqani rasmiylashtirishda yordam berish uchun ish stajini sun’iy oshirib berish evaziga 7 mln so‘m olayotganida ushlangan.

Aniqlanishicha, u bu ishni Bandlik va kambag‘allikni qisqartirish tizimidagi mansabdor shaxs — o‘g‘li orqali amalga oshirishni rejalashtirgan.