AQSh prezidenti Donald Tramp Fors ko‘rfazida amalga oshirilayotgan “Ozodlik loyihasi” operatsiyasi qisqa muddatga to‘xtatilishini ma’lum qildi.

Uning so‘zlariga ko‘ra, mazkur qaror Eron bilan ehtimoliy tinchlik kelishuvi imkoniyatlarini baholash maqsadida qabul qilingan. Operatsiya, shuningdek, muzokaralarda vositachilik qilayotgan Pokiston iltimosiga binoan to‘xtatilmoqda.

Tramp Truth Social’dagi sahifasida bu qarorni “katta harbiy muvaffaqiyatlar” va muzokaralardagi “sezilarli yutuqlar” bilan izohladi. Shu bilan birga, blokada saqlanib qolishi ta’kidlandi.

Mazkur bayonot fonida Osiyo bozorlarida savdolar ochilishi bilan neft narxlari biroz pasaydi.

AQSh Davlat kotibi Marko Rubio esa operatsiya mudofaa xarakteriga ega ekanini bildirib, Vashington kelishuvga erishishni ustuvor deb bilishini ta’kidladi.

Avvalroq AQSh Markaziy qo‘mondonligi (CENTCOM) Hormuz bo‘g‘ozida kemalarga hamrohlik qilish operatsiyasiga minglab harbiylar, samolyotlar va harbiy kemalar jalb etilganini ma’lum qilgandi.