Bugun O‘zbekiston nafaqat Markaziy Osiyoning, balki keng Yevroosiyo makonining eng faol investitsiyaviy maydonlaridan biri sifatida e’tirof etilmoqda. Bunga Toshkent xalqaro investitsiya forumining yildan-yilga ortib borayotgan nufuzi va unda qatnashayotgan xalqaro mehmonlar soni yaqqol misol bo‘la oladi.Joriy yilgi forum o‘z ko‘lami bilan avvalgi natijalarni ortda qoldirdi. Tadbirda 10 ming 600 nafardan ortiq ishtirokchi qatnashgan bo‘lsa, ularning 4 mingdan ziyodi dunyoning 102 mamlakatidan tashrif buyurgan xorijiy investorlar, biznes vakillari va xalqaro tashkilotlar rahbarlaridan iborat bo‘ldi.

Forumda Germaniya Prezidenti Frank-Valter Shtaynmayer, Albaniya Prezidenti Bayram Begay kabi davlat rahbarlari, shuningdek Rossiya, Belarus, Ozarbayjon, Qozog‘iston, Qirg‘iziston va Tojikiston hukumatlari rahbarlari ishtirok etdi. Bundan tashqari, Jahon banki, Osiyo taraqqiyot banki, Xalqaro moliya korporatsiyasi, Yevropa tiklanish va taraqqiyot banki hamda boshqa yirik xalqaro moliyaviy institutlar vakillari ham Toshkentda jam bo‘ldi.Forumning eng muhim jihatlaridan biri shundaki, uning ishtirokchilari sun’iy rag‘batlantirish yoki maxsus imtiyozlar asosida emas, balki O‘zbekiston iqtisodiyotining istiqboliga bo‘lgan ishonch tufayli tashrif buyurmoqda. 

Xorijiy investorlar va mehmonlar safar bilan bog‘liq barcha xarajatlarni mustaqil ravishda qoplagan holda forumda qatnashayotgani mamlakatning xalqaro maydondagi investitsiyaviy jozibadorligi ortib borayotganini ko‘rsatadi.So‘nggi yillarda amalga oshirilayotgan iqtisodiy islohotlar, biznes yuritish uchun yaratilayotgan qulay sharoitlar, investorlar huquqlarining mustahkam himoya qilinayotgani hamda ochiq iqtisodiyot tamoyillarining izchil joriy etilishi O‘zbekistonning xalqaro reyting va baholardagi mavqeini sezilarli darajada yaxshiladi.

Bugungi kunda Toshkent xalqaro investitsiya forumi nafaqat investitsiyalarni jalb qilish maydoni, balki mintaqaviy hamkorlik, iqtisodiy integratsiya va yirik loyihalarni muhokama qiluvchi muhim xalqaro platformaga aylanmoqda. Turli davlatlar rahbarlari va yirik moliyaviy institutlar vakillarining bir maydonda jam bo‘lishi O‘zbekistonning mintaqadagi strategik o‘rni tobora mustahkamlanayotganidan dalolat beradi.Mutaxassislar fikricha, forum yakunlari bo‘yicha erishiladigan kelishuvlar va imzolanadigan investitsiya bitimlari mamlakat iqtisodiyotining yangi o‘sish nuqtalarini shakllantirishga xizmat qiladi. Bu esa O‘zbekistonning nafaqat investitsiyalarni jalb qiluvchi davlat, balki mintaqadagi iqtisodiy jarayonlarni birlashtiruvchi va rivojlanishga yo‘naltiruvchi markaz sifatidagi rolini yanada kuchaytiradi.