Albaniya Respublikasi Prezidentining O‘zbekistonga rasmiy tashrifi doirasida Ko‘ksaroy qarorgohida O‘zbekiston Respublikasi Birinchi xonimi Ziroat Mirziyoyeva hamda Albaniya Respublikasi Birinchi xonimi Armanda Begay o‘rtasida uchrashuv bo‘lib o‘tdi.

Ochiq va samimiy ruhda o‘tgan muloqot davomida tomonlar O‘zbekiston va Albaniya xalqlari o‘rtasidagi do‘stlik rishtalarini mustahkamlash, o‘zaro anglashuvni rivojlantirish hamda madaniy-gumanitar hamkorlikni kengaytirish istiqbollarini muhokama qildi.

Madaniy dastur doirasida Armanda Begay o‘zbek amaliy san’ati namunalari, jumladan, yog‘och o‘ymakorligi, qadimiy so‘zana kashtachiligi va an’anaviy kulolchilik buyumlari bilan yaqindan tanishdi.

Tashrifning yorqin lahzalaridan biri o‘zbek milliy liboslari namoyishi hamda mamlakatimizning turli hududlariga xos urf-odatlarni aks ettirgan “Kelin salom” marosimi taqdimoti bo‘ldi. Oliy martabali mehmon o‘zbek xalqining boy madaniy merosi, milliy qadriyatlari va asrlar davomida shakllangan an’analariga yuksak baho berib, ularning o‘ziga xosligi va tarixiy ahamiyatini alohida e’tirof etdi.