Navoiy viloyatining Uchquduq tumanida yirik yong‘in sodir bo‘lib, savdo do‘konlari va omborxonalarga jiddiy zarar yetdi. Hodisa 16-iyun kuni “Mustaqillik” mahalla fuqarolar yig‘ini hududidagi Amir Temur ko‘chasida joylashgan savdo majmuasida yuz bergan.Dastlabki ma’lumotlarga ko‘ra, yong‘in MCHJ va yakka tartibdagi tadbirkorga tegishli savdo do‘konlari hamda omborxonalardan birida kelib chiqqan. 

Voqea haqida xabar kelib tushishi bilan hududga Favqulodda vaziyatlar boshqarmasining yong‘in-qutqaruv ekipajlari, shuningdek, Navoiy kon-metallurgiya kombinati va “Navoiyuran” davlat korxonasi qutqaruvchilari safarbar etildi.Jami olti ta yong‘in-qutqaruv ekipaji jalb qilingan tezkor amaliyot natijasida alanga qisqa vaqt ichida qurshab olinib, yong‘inning yanada keng hududga tarqalishining oldi olindi. Qutqaruvchilarning sa’y-harakatlari tufayli savdo majmuasining qariyb 2 ming kvadrat metr maydoni olovdan saqlab qolindi.Shunga qaramay, yong‘in oqibatida do‘kon va omborxonalarning taxminan 300 kvadrat metr maydoni yonib ketgan. Ichkarida saqlanayotgan oziq-ovqat mahsulotlari, qurilish mollari hamda boshqa tovar-moddiy boyliklar ham zarar ko‘rgan.

Rasmiy ma’lumotlarga ko‘ra, hodisa oqibatida halok bo‘lganlar yoki tan jarohati olgan fuqarolar qayd etilmagan. Ayni paytda yong‘inning kelib chiqish sabablari va yetkazilgan moddiy zarar miqdori bo‘yicha tegishli mutaxassislar tomonidan surishtiruv ishlari olib borilmoqda.Eslatib o‘tamiz, shu kuni Farg‘ona viloyatida ham yong‘in sodir bo‘lib, u yerda ikki kishi halok bo‘lgani xabar qilingan edi. Mazkur holatlar yong‘in xavfsizligi qoidalariga qat’iy rioya qilish zarurligini yana bir bor eslatmoqda.