Surxondaryo viloyatida Davlat xavfsizlik xizmati va Ichki ishlar boshqarmasi hamkorligida o‘tkazilgan tezkor tadbirlar davomida katta miqdordagi giyohvandlik vositalarining noqonuniy aylanmasi fosh etildi.

Dastlabki ma’lumotlarga ko‘ra, Afg‘oniston hududidan kontrabanda yo‘li bilan jami 25 kg 444 gramm “opiy” va 11 kg 86 gramm “gashish” mamlakatga olib kirilgan. Jami miqdor 37 kilogrammdan ortiqni tashkil etadi.Tergov ma’lumotlarida qayd etilishicha, mazkur narkotik vositalar yashirin yo‘llar orqali O‘zbekistonga olib kirilib, keyinchalik Samarqand shahriga yetkazilgan. Ularni qabul qilib olgan vaqtida 1989 va 1997 yilda tug‘ilgan ikki nafar mahalliy fuqaro hamda 1993 va 1995 yilda tug‘ilgan ikki nafar xorijlik shaxs qo‘lga olingan. 

Shuningdek, boshqa bir tezkor tadbir davomida Termiz xalqaro savdo markazida 1955 va 2001 yilda tug‘ilgan ikki nafar Afg‘oniston fuqarosi 1 kg 76 gramm “opiy” moddasini 5 ming AQSH dollariga sotayotgan vaqtida ushlangan.Mutasaddilar ma’lumotiga ko‘ra, ayrim holatlarda giyohvand moddalarni yashirin olib kirishda “jonli konteyner” usuli ham qo‘llangan.Hozirda barcha gumonlanuvchilarga nisbatan Jinoyat kodeksining tegishli moddalari bo‘yicha jinoyat ishlari qo‘zg‘atilgan va “qamoq” ehtiyot chorasi qo‘llanilgan. Tergov harakatlari davom etmoqda.Huquqni muhofaza qiluvchi organlar fuqarolarni giyohvandlik vositalari bilan bog‘liq noqonuniy holatlarga befarq bo‘lmaslikka va 1520 ishonch raqamiga xabar berishga chaqirmoqda.