Shu kunlarda Tailandda velotrek boʻyicha Osiyo kubogi davom etmoqda.

Unda hamyurtlarimiz Tailand, Malayziya, Qozogʻiston, Janubiy Koreya, Birlashgan Arab Amirliklari va boshqa davlatlardan kelgan tajribali velosportchilar bilan bir qatorda medallar uchun kurash olib borishmoqda.

Kecha boʻlib oʻtgan musobaqaning uchinchi kungi bahslari yakuniga koʻra, oʻzbekistonliklar yana 3ta medalni qoʻlga kiritishdi.

Jumladan, Margarita Misyurina Olimpiya musobaqalari turkumiga kiruvchi eng murakkab boʻlgan Omnium poygasida bronza medaliga sazovor boʻldi.

Dmitriy Bocharov ochkolar boʻyicha guruh poygasida terma jamoamiz gʻaznasiga yana bitta bronza medalini qoʻshib qoʻydi.

Nihoyat Yanina Kuskova esa ochkolar boʻyicha guruh poygasida kumush medalni qoʻlga kiritdi.

Yana bir hamyurtimiz Nafosat Koziyeva ham ochkolar boʻyicha guruh poygasida qatnashdi, biroq unga sovrinli 3-oʻrin uchun biroz omad yetishmadi va yurtdoshimiz 4-oʻrin bilan kifoyalandi.

Taʼkidlash joiz, xalqaro turnirlardagi muvaffaqiyatlari natijasida velosportchilarimiz qimmatli reyting ochkolarini qoʻlga kiritib, 2024-yili Parijda boʻlib oʻtadigan Olimpiya oʻyinlari litsenziyalariga tobora yaqinlashmoqda.

• Osiyo Chempionati
• O‘zbekiston
• Tailand
• Velosport