Bugun, 30 mart kuni “Yagona umumrespublika prosessing markazi” MCHJ UzCard plastik kartalarini banklar mijozlariga bir zumda chiqarib berish imkonini beruvchi yangi xizmatni taqdim etdi.

Qayd etilishicha, yangi turdagi UzCard kartalari NFC texnologiyasi orqali kontaktsiz to‘lovlarni qo‘llab-quvvatlaydi hamda bu kartalarning raqamlari bo‘rttirilgan shaklda bo‘ladi. Yangi turdagi kartalarga bag‘ishlangan tadbir davomida Entrust kompaniyasining “Entrust Datacard 840CE” modeldagi uskunasi yordamida raqamlari bo‘rttirilgan yangi turdagi kartalarni chop etish jarayoni namoyish etilgan.

Ta’kidlanishicha, mijoz bankka murojaat qilgan vaqtdan mazkur kartani rasmiylashtirish va faollashtirishga qadar bo‘lgan muddat 5 daqiqani tashkil etadi. Ya’ni, odamlarga kartani ro‘yxatdan o‘tkazish va olish uchun bankka ikki marta kelish shart emas, mijoz murojaat qilgan kundayoq darhol UzCard kartasini olishi va moliyaviy operasiyalarni amalga oshirish mumkin”, – deya tushuntirgan kompaniya.

Markaz tomonidan NFC texnologiyali kartalardan foydalanishda kontaktsiz to‘lovni qabul qilish va boshqa operasiyalarni amalga oshirish uchun terminal infratuzilmasini rivojlantirish davom ettirilishi qayd etildi. Mazkur kartalar bilan jamoat transportida yo‘l haqini to‘lash mumkin bo‘ladi.

Shuningdek, Uzcard karta raqamlari boshlanishidagi “8600” raqam juftligi “5614”ga almashtiriladi. Agar karta kobeyjing Uzcard-Union Pay bo‘lsa, karta “6262” raqam juftligi bilan, karta kobeyjing UzCard-Mastercard bo‘lsa, karta “5440” raqam juftligi bilan boshlanadi.

• Uzcard