O‘zbekistondagi milliy pochta aloqasi operatori — “O‘zbekiston pochtasi” (UzPost) xususiylashtirilgani haqida iqtisodchi Otabek Bakirov ma’lum qildi. Uning so‘zlariga ko‘ra, davlat ulushi “shimoliy marketpleyslardan biri”ga sotilgan bo‘lishi mumkin. Bu orqali u ehtimol Rossiyaning yirik onlayn savdo maydonchalaridan birini nazarda tutgan. Boshqa bir tasdiqlanmagan manbalarga ko‘ra, bu Rossiyada so‘nggi yillarda katta shov-shuvlar va qurolli to‘qnashuvlarga sabab bo‘lgan “Wildberries” marketpleysi.

Bakirovning ma’lumotini Spot nashriga yaqin manba ham tasdiqlagan, ammo sotilgan ulush miqdori haqida aniq ma’lumot berilmagan. Ayni damda davlat aktivlarini boshqarish agentligi ham “UzPost” rahbariyati xususiylashtirish jarayoniga oid ma’lumotni rasman izohlamagan.

Ma’lumki, joriy yil iyun oyida “UzPost”ning affillangan shaxslar ro‘yxatida katta o‘zgarishlar bo‘lgan. Ro‘yxatdan “Aloqabank”, Iqtisodiyot va moliya vazirligi hamda unga tegishli 20 foizdan ortiq ulushga ega kompaniyalar chiqarib tashlangan.

Shuning o‘rniga affillanganlar qatoriga Davlat aktivlarini boshqarish agentligi ushbu agentlikka tegishli yuridik shaxslar va O‘zbekiston Milliy investitsiya jamg‘armasi qo‘shilgan. Ushbu uch subyekt “UzPost” aksiyalarining 20 foizdan ziyod ulushiga ega bo‘lgan.

Sentyabr oyida avval O‘zbekiston Milliy investitsiya jamg‘armasiga berilishi rejalashtirilgan 25 foizlik ulush Davlat aktivlarini boshqarish agentligi ixtiyoriga o‘tkazilgan edi. Bu o‘zgarishlar “UzPost” aksiyalarining keyinchalik to‘liq xususiylashtirishga tayyorlanayotganini ko‘rsatmoqda.

Hozircha yangi egasining nomi oshkor etilmagan bo‘lsa-da, tahlilchilar fikricha, Rossiya marketpleyslaridan biri bilan strategik hamkorlik yoki to‘g‘ridan-to‘g‘ri sotib olish bitimi bo‘lishi ehtimoldan xoli emas. Bu o‘z navbatida O‘zbekiston pochta logistika tizimida raqamli xizmatlar ulushini oshirishga xizmat qilishi kutilmoqda.

• Xususiylashtirish