Senatning 24-yalpi majlisida vazir Po‘lat Bobojonov O‘zbekistonda huquqbuzarliklarning oldini olish va ularning profilaktikasi holati to‘g‘risida 2021-yil yakuni bo‘yicha axborot berdi.

Vazirning maʼlum qilishicha, o‘tgan yili umumiy jinoyatlarning 89 foizi fosh etilgan, qidiruvdagi 4 615 nafar shaxs ushlangan, bedarak yo‘qolgan 507 nafar shaxs topilgan.

9 314 ta mahallada kriminogen vaziyat tahlil qilinib, mahallalar “qizil”, “sariq” va “yashil” toifalarga ajratilgan.

Ko‘rilgan choralar natijasida 2021-yilda 2 639 ta mahallada (28,3 foiz) jinoyatlar sodir etilmagan, 3 628 tasida (39 foiz) ularning sodir etilishi holatlari kamaygan.

Iqtisodiyot, boshqaruv va odil sudlov sohasida 1 313 nafar shaxs tomonidan sodir etilgan 1 018 ta jinoyat aniqlanib, ular oqibatida yetkazilgan 86,1 mlrd so‘m miqdoridagi zarar undirilishi taʼminlangan.

Qayd etilishicha, 2021-yilda sodir etilgan jinoyatlar umumiy soni 84 100 tani tashkil etib, har 100 ming aholiga o‘rtacha 321,4 tadan to‘g‘ri kelgan.

Voyaga yetmaganlar tomonidan sodir etilgan jinoyatlarning soni bo‘yicha esa ayrim hududlarda yuqoriligicha qolmoqda. Jumladan, ushbu jinoyatlarning 65,2 foizi Farg‘ona, Toshkent, Namangan va Buxoro viloyatlariga to‘g‘ri keladi.

Bundan tashqari, 14 mingdan ortiq ishsizlar tomonidan jinoyatlar sodir etilganligi joylarda aholini ish bilan taʼminlash masalalari samarali hal etilmayotganini ko‘rsatgan.

• Bobojonov
• Jinoyat
• Senat
• statistika