XAMAS harakati Isroil garovidagi jasadni almashtirish sababini aniqlashga va’da berdi. Isroil ma’lumotlariga ko‘ra, jasad Shiri Bibasga tegishli emas. XAMAS’ning ta’kidlashicha G‘azo sektoridagi Isroil havo hujumidan keyin vayronalar ostidan topilgan jasadlar bilan “adashtirib yuborilgan” bo‘lishi mumkin.

20-fevral kuni XAMAS Qizil xochga 33 yoshli Shiri Bibas va uning o‘g‘illari (ikki yoshli Kfir va besh yoshli Ariel) hamda 83 yoshida Nir-Oz kibutsidan o‘g‘irlab ketilgan jurnalist Oded Lifshitsning jasadlarini topshirdi. Tekshiruv natijalariga ko‘ra, Isroil ayolning jasadi Shiri Bibasga tegishli emasligini aytdi.

XAMAS’ning ta’kidlashicha, Isroil havo hujumida ikki bola va ona o‘ldirilgan. Isroil bu versiyani rad etdi va garovga olinganlarning o‘limining haqiqiy sababini aniqlashga va’da berdi.

• Falastin
• Isroil