Kecha, 5-mart kuni e’lon qilingan budjet loyihasiga ko‘ra, Xitoy 2023-yilda harbiy budjetini 7,2 foizga oshirib, 1 trln. 553,7 milliard yuanga (bugungi kurs bo‘yicha qariyb 224,8 milliard dollar) yetkazadi.
“Milliy mudofaa xarajatlari 1 trln 553,7 milliard yuanni tashkil etadi, bu 7,2 foizga o‘sish”, – deyiladi Butunxitoy xalq vakillari yig‘ilishining yillik sessiyasi ochilishida e’lon qilingan hujjatda.
XIV Butunxitoy xalq vakillari kongressining birinchi sessiyasi matbuot kotibi Van Chao 4-mart kuni bo‘lib o‘tgan matbuot anjumanida Xitoy o‘zining mudofaa budjetini murakkab xavfsizlik muammolarini hal qilish va yirik davlat majburiyatlarini bajarish zaruratidan kelib chiqib oshirayotganini ta’kidladi. Uning so‘zlariga ko‘ra, Xitoy qurolli kuchlarini modernizatsiya qilish dunyoning hech bir davlatiga xavf tug‘dirmaydi.
Qayd etilishicha, Xitoy urushlarda qatnashmaydi va harbiy doktrinaning mudofaa xarakteriga amal qiladi, lekin shu bilan birga u har yili mudofaa xarajatlarini oshiradi. Hozirgi vaqtda XXR harbiy budjeti dunyoda AQShdan keyin ikkinchi o‘rinda turadi. 2022-yilgi budjet loyihasiga ko‘ra, Xitoy harbiy budjetni yillik hisobda 7,1 foizga oshirib, harbiy budjetni 1,45 trillion yuanga (209,9 milliard dollar) yetkazishni rejalashtirgan.
Bu tendensiya boshqa davlatlar tomonidan tashvish va tanqidlarga sabab bo‘lgan, biroq Xitoy rasmiylari mamlakatning harbiy xarajatlari oqilona ekanligi va ular mamlakat iqtisodiy rivojlanishiga mos ravishda barqaror o‘sishni saqlab qolishlarini ta’kidlamoqda.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!