Sentyabr oyida Jenevada Xalqaro saratonga qarshi kurash ittifoqi (UICC) kongressi bo‘lib o‘tdi. Xalqaro guruh tomonidan tadqiqotning ilk natijalari taqdim etildi va u hayratlantirdi. Amerika onkologiya hamjamiyati (ACS) hamda JSSTning Saratonni tadqiq etish bo‘yicha xalqaro agentligi tadqiqotchilari saratonga chalinish holatlari oshishini aniqlash maqsadida dunyoning 50 ta mamlakatidan to‘plangan ma’lumotlarni o‘rgandi. Ushbu davlatlarning 14 tasida saratonga chalinish holati faqat yoshlarda oshgan bo‘lib, keksa insonlarda bu boradagi ko‘rsatkichlar barqarorligicha qolmoqda.

Dunyoda 40 yoshgacha bo‘lgan insonlar orasida ko‘krak saratoni, yo‘g‘on ichak saratoni va uning boshqa turlaridan vafot etish holatlari ortib bormoqda. So‘nggi 10 yilda 25-49 yoshgacha bo‘lgan insonlar orasida yo‘g‘on ichak saratoni darajasi 24 mamlakatda, jumladan, Buyuk Britaniya, AQSh, Fransiya, Avstraliya, Kanada, Norvegiya va Argentinada oshgan.

ACS’ning yangi hisobotiga ko‘ra, oxirgi 10-yilda ayollar o‘rtasida ko‘krak saratonidan vafot etish holati taxminan 10 foizga kamaygan bo‘lsa-da, ushbu kasallikka chalinish holati yiliga 1 foizga oshmoqda.

Olimlarning qayd etishicha, saraton kasalligining yoshlar orasida ko‘payishiga semirish va metabolik sindrom sabab bo‘lyapti. Oxirgi tadqiqotlardan ma’lum bo‘lishicha, 18-40 yoshgacha bo‘lgan insonlarda saratonning 18 tagacha turi ortiqcha vazn tufayli yuzaga kelmoqda.

Shuningdek, antibiotiklardan foydalanish ham saratonning paydo bo‘lishiga xizmat qilishi mumkinligi ustida o‘rganishlar olib borilmoqda. 2000-yilda besh yoshgacha bo‘lgan bolalar o‘rtasida antibiotik qabul qilish har 1000 kishiga 9,8 nafarni tashkil etgan bo‘lsa, 2018-yilga kelib, ushbu ko‘rsatkich 14,3 nafarga yetgan.

• Lifestyle
• salomatlik