Koronavirus bilan kasallangan yana bir bemor vafot etib, O‘zbekistonda pandemiya sababli vafot etganlar soni 12 nafarga yetdi.

Sog‘liqni saqlash vazirligi axborot xizmatining xabariga ko‘ra, xalqaro masofaga qatnashga mo‘ljallangan yuk avtomashina haydovchisi I. Rossiyadan Tojikiston orqali Surxondaryoga kirib kelgan. Asli sirdaryolik bo‘lgan ushbu fuqaroda ikki tomonlama pnevmoniya og‘ir kechib, 5-may kuni viloyat yuqumli kasalliklar shifoxonasiga yotqizilgan. O‘tkazilgan diagnostik tahlillardan so‘ng bemorda “Covid-19” infeksiyasi ham aniqlangan.

Xabar berilishicha, shu yilning 11-may kuni esa ahvoli yomonlashgach “Covid-19” infeksiyasining og‘ir kechishi, ikki tomonlama o‘tkir bronxopnevmoniya og‘ir turi tashxisi bilan reanimatsiya bo‘limiga olingan. Bo‘limda bemorga mutaxassislar tomonidan belgilangan standartlar asosida reanimatsion yordam ko‘rsatilgan.  

Bundan tashqari, vazirlikning turli yo‘nalishlari bo‘yicha bosh mutaxassislari va Respublika shoshilinch tibbiy yordam ilmiy markazi mutaxassislari tomonidan telemeditsina orqali konsiliumlar ham o‘tkazilib, doimiy nazorat ta’minlangan. Biroq ko‘rsatilgan reanimatsion muolajalarga qaramasdan sun’iy nafas olish apparatida bo‘lgan bemor yurak qon-tomir va o‘tkir nafas yetishmovchiligidan vafot etgan. 

O‘zbekiston bo‘ylab koronavirus infeksiyasidan butunlay sog‘ayganlar 2245 nafarga yetgan bo‘lsa, infeksiyasi qayd etilganlar soni 2741 nafarni tashkil qilmoqda.

Eslatib o‘tamiz, avvalroq ham Samarqand viloyatida ushbu infeksiyaga chalingan bemor vafot etgan edi.