Sog‘liqni saqlash vaziri Alisher Shadmanov O‘zbekistondagi tibbiyot oliy ta’lim muassasalari rektorlari va filiallar direktorlariga talabalarini ma’lum muddatga amaliyot o‘tashlari uchun o‘qishdan ozod qilish to‘g‘risida buyruq berdi.

Vazir imzolagan ko‘rsatma-xatga ko‘ra, O‘zbekistan Respublikasi tibbiyot va farmasevtika oliy ta’lim muassasalarida joriy yilning 16–23-mart kunlari bakalavriat, magistratura talabalari, klinik ordinator (rezident)larning ishlab chiqarish amaliyoti tashkil etiladi.

O‘quv muassasasi talabalarining bir haftalik ishlab chiqarish amaliyoti mos ravishda o‘zlar doimiy ro‘yxatda turgan hududga yaqin bo‘lgan mas’ul tashkilotlarda amalga oshiriladi. 

Xususan, 

Andijon, Namangan viloyatlaridan kelgan talabalar Andijon davlat tibbiyot institutida;

Farg‘ona viloyatidan kelgan talabalar Toshkent tibbiyot akademiyasi Farg‘ona filialida;

Buxoro, Navoiy viloyatlaridan kelgan talabalar Buxoro davlat tibbiyot institutida;

Samarqand, Qashqadaryo viloyatlaridan kelgan talabalar Samarqand davlat tibbiyot institutida;

Surxondaryo viloyatidan kelgan talabalar Toshkent tibbiyot akademiyasi Termiz filialida;

Xorazm viloyatidan kelgan talabalar Toshkent tibbiyot akademiyasi Urganch filialida;

Qoraqalpog‘iston Respublikasidan kelgan talabalar Qoraqalpog‘iston tibbiyot institutida;

Toshkent shahri, Toshkent, Sirdaryo, Jizzax viloyatlaridan kelgan talabalar Toshkent tibbiyot akademiyasi, Toshkent pediatriya tibbiyot instituti, Toshkent davlat stomatologiya instituti va Toshkent farmatsevtika institutida amaliyot o‘taydilar.

Ko‘rsatma-xatda aytilishicha, talabalarning ishlab chiqarish amaliyotiga ma’sul professor-o‘qituvchilar biriktiriladi ularga “Sog‘lom turmush tarzi” va “Yuqumli kasalliklar, shu jumladan koronavirus infeksiyasi profilaktikasi” mavzularida seminar mashg‘ulotlari o‘tkaziladi.

Amaliyot Sanitariya-epidemiologik osoyishtalik agentligi, Virusologiya ilmiy tekshirish institut, aholining sog‘lom turmush tarzini qo‘llab-quvvatlash va jismoniy faolligini oshirish markazi xodimlari bilan hamkorlikda malakaviy amaliyotga ma’sul professor-o‘qituvchilari rahbarligida amalga oshiriladi.

Ma’lumot uchun, mazkur buyruq ijrosini nazorat qilish vazirning birinchi o‘rinbosari B. Yusupaliyev zimmasiga yuklatilgan.