O‘zbekistonda 2026-yilning birinchi choragida soliq tushumlari 63,6 trillion so‘mni tashkil etdi. Soliq qo‘mitasi ma’lumotiga ko‘ra, bu o‘tgan yilning shu davriga nisbatan 24 foizga ko‘p.

Eng katta tushum foyda solig‘i hissasiga to‘g‘ri kelgan. Ushbu yo‘nalish bo‘yicha 20,4 trillion so‘m yig‘ilgan bo‘lib, bu 2025-yilning birinchi choragiga nisbatan 43 foizga oshgan.

Qo‘shilgan qiymat solig‘i (QQS) tushumi 12,5 trillion so‘mni tashkil etib, 27 foizga o‘sgan. Jismoniy shaxslardan olinadigan daromad solig‘i esa 10,7 trillion so‘m bo‘lib, 15 foizga ko‘paygan.

Shuningdek, yer qa’ridan foydalanganlik uchun soliq tushumlari 6 trillion so‘mga, aksiz solig‘i 4,6 trillion so‘mga yetgan. Yer solig‘i 34 foizga, suv resurslaridan foydalanganlik uchun soliq esa 82 foizga oshgani qayd etilgan.

Soliq qo‘mitasi ma’lumotiga ko‘ra, qurilish korxonalari 2,6 trillion so‘mdan ortiq, ishlab chiqarish korxonalari qariyb 42 trillion so‘m, xizmat ko‘rsatish sohasi esa 10,8 trillion so‘m soliq to‘lagan.

Bundan tashqari, O‘zbekistonda elektron xizmat ko‘rsatuvchi xorijiy kompaniyalar tomonidan 65,7 milliard so‘m soliq to‘langan.