Isroilda hantavirus bilan kasallanishning birinchi holati qayd etildi. Bu haqda The Jerusalem Post xabar berdi.

Ma’lum qilinishicha, bemor bir necha oy oldin Sharqiy Yevropaga sayohat qilgan va virusni o‘sha hududda yuqtirib olgan bo‘lishi mumkin. Unda kasallik belgilari paydo bo‘lgach, u tibbiy yordamga murojaat qilgan. Dastlab antitanachalar bo‘yicha o‘tkazilgan test hantavirus mavjudligini ko‘rsatgan, keyinchalik PCR-testi kasallikni rasman tasdiqlagan.

Bemorning holati barqaror deb baholanmoqda. U intensiv terapiya yoki qat’iy izolyatsiyaga muhtoj emas. Uning shaxsi va davolanayotgan shifoxonasi ochiqlanmagan. Aniqlangan virus shtammi Atlantika okeanidagi MV Hondius kruiz laynerida tarqalgan shtammdan farq qilishi aytilmoqda. JSST ma’lumotiga ko‘ra, ushbu kemada hantavirus sababli ikki kishi vafot etgan va kamida sakkiz kishi kasallangan.

Bortida 150 ga yaqin yo‘lovchi bo‘lgan MV Hondius kemasi Ispaniyaga yo‘l olgan va 10-may kuni Tenerife oroliga yetib borishi rejalashtirilgan. Hozirda kemada kasallik belgilari bo‘lgan yo‘lovchilar yo‘qligi bildirilgan.

Reuters xabariga ko‘ra, bir qator davlatlar kasallik tarqalishining oldini olish maqsadida kemadan tushgan yo‘lovchilarni kuzatuvga olgan. Virus haqida xabarlar paydo bo‘lishidan oldin 40 ga yaqin yo‘lovchi Santa-Elena portida kemani tark etgan. Ularning aksariyati hozircha aniqlanmagan.

Hantavirus — kemiruvchilardan, asosan ularning chiqindilari orqali yuqadigan viruslar guruhi bo‘lib, og‘ir o‘pka va buyrak shikastlanishiga olib kelishi mumkin. Kasallik isitma, bosh va mushak og‘riqlari, ko‘ngil aynishi hamda holsizlik bilan kechadi. Maxsus davo yo‘q, faqat qo‘llab-quvvatlovchi terapiya qo‘llanadi.