Wi-Fi yoki mobil internetingiz yoqilgan bo‘lsa-yu, ammo internet ishlamasa nima qilish kerak? Bu holda ulanish bor, hammasi yaxshiday ko‘rinadi, ammo internet ishlamaydi, brauzerdagi sahifalar ochilmaydi, ijtimoiy tarmoqlarda “lenta” yangilanmaydi, internet bilan ishlovchi dasturlar ham ishlamaydi. Odatda, bu muammo Wi-Fi routerni sozlash jarayonida sodir bo‘ladi, xolos. Lekin ko‘pchilik ishlayotgan paytda to‘satdan ulanish yo‘qolib qolishi holatlari bo‘lishi mumkin. Bunday hollarda qanday yo‘l tutish kerakligi haqida quyida so‘z boradi.

Muammoning sabab va yechimlari ko‘p bo‘lishi mumkin. Shuning uchun ham, avvalo, muammoning sababchisini aniqlab olish kerak. Aybdor esa odatda, Wi-Fi routeri yoki internetdan foydalanadigan qurilmamiz (telefon, noutbuk, planshet, kompyuter) bo‘lishi mumkin. 

Wi-Fi routeri ishlamayotganini sezsangiz, avvalambor qurilmani qayta o‘chirib, yoqing.  Albatta, internet uchun pul to‘langanligiga ishonch hosil qiling. Buni aniqlash uchun internet-operatorga qo‘ng‘iroq qilishingiz ham mumkin. Avvalo, simlar yo‘riqnoma bo‘yicha routerga to‘g‘ri ulanganligini tekshiring.

Agar router yaxshi ishlayotgan bo‘lsa, muammo noutbuk yoki kompyuteringizda bo‘lishi mumkin. Bu holda avvalambor qurilmangizni qayta o‘chirib, yoqing va IP-manzilni avtomatik tarzda olishga sozlanganligini tekshiring. Noutbukni ham, internetni ham qayta o‘chirib yoqing. Lekin internet faqat sizda emas boshqa qurilmalarda ham ishlamayotgan bo‘lsa, muammo routerda.

Android, iOS yoki Windows Phone’da ishlaydigan mobil qurilmalarda ham xuddi shu holatni takrorlash kerak. Qurilma Wi-Fi’ga ulangan, ammo brauzerdagi sahifalar ochilmayotgan bo‘lsa, telefoningizdan Wi-Fi’ni o‘chiring va qayta ulanishga harakat qilib ko‘ring.