JCH–2026 o‘yinlarini stadionlarda tomosha qilishni rejalashtirgan ko‘plab o‘zbekistonlik muxlislar AQSh vizasini olishda jiddiy qiyinchiliklarga duch kelmoqda.Ma’lumotlarga ko‘ra, Jahon chempionatiga yo‘llanma olgan 11 davlat fuqarolari orasida AQSh vizasi rad etilish darajasi 40 foizdan yuqori.

O‘zbekiston ham ushbu ro‘yxatdan o‘rin olgan bo‘lib, ariza topshirgan fuqarolarning yarmidan ko‘prog‘i viza ololmagan.Mutaxassislar buni AQShdagi qat’iy immigratsiya siyosati va kuchaytirilgan xavfsizlik tekshiruvlari bilan izohlamoqda. FIFA tomonidan konsulliklardagi jarayonlarni yengillashtirish uchun “FIFA Pass” tizimi joriy etilgan bo‘lsa-da, u vizaning tasdiqlanishini kafolatlamaydi.

Shuningdek, Kanada va Meksikada ham ayrim davlatlar fuqarolari uchun viza rasmiylashtirish bilan bog‘liq ma’muriy to‘siqlar saqlanib qolmoqda. Xususan, Meksikaning O‘zbekistonda diplomatik vakolatxonasi yo‘qligi ham muxlislar uchun qo‘shimcha murakkablik tug‘dirmoqda. Eslatib o‘tamiz, 2026-yilgi futbol bo‘yicha Jahon chempionati 11-iyundan 19-iyulgacha AQSH, Kanada va Meksikada bo‘lib o‘tadi.