Jumladan, Prezident Administratsiyasi rahbarining birinchi o‘rinbosari Sergey Kiriyenko, Prezident matbuot kotibi va Administratsiya rahbari o‘rinbosari Dmitriy Peskov, Strategik sheriklik va hamkorlik boshqarmasi boshlig‘i Vadim Titov, Jamoat loyihalari boshqarmasi boshlig‘i Sergey Novikov hamda AKT va aloqa infratuzilmasini rivojlantirish boshqarmasi boshlig‘i Tatyana Matveyeva bilan muloqotlar tashkil etildi.

Shuningdek, Rossiyaning yetakchi jamoat va yoshlar tashkilotlari, kreativ industriya hamda media sohasi vakillari bilan ham uchrashuvlar bo‘lib o‘tdi.

Muzokaralar davomida professional aloqalarni mustahkamlash, matbuot xizmatlari, tahliliy markazlar va fuqarolik jamiyati institutlari o‘rtasidagi hamkorlikni kengaytirish, shuningdek, qo‘shma ta’lim va malaka oshirish dasturlarini yo‘lga qo‘yish istiqbollari muhokama qilindi.

Tashrif doirasida boshqaruv kadrlarini tayyorlash bo‘yicha ilg‘or tajribaga ega “Senej” boshqaruv ustaxonasi faoliyati bilan ham yaqindan tanishildi. Markazning zamonaviy yondashuvlari va ta’lim metodikalari delegatsiya a’zolarida katta taassurot qoldirdi.

Uchrashuvlar yakunlari media va kommunikatsiyalar sohasida konstruktiv hamkorlikni rivojlantirish, tajriba almashishni faollashtirish hamda istiqbolli qo‘shma loyihalarni amalga oshirish borasida tomonlarning o‘zaro manfaatdorligini namoyon etdi.