Hozirgi kunda butun dunyoda global muammoga aylanib ulgurgan COVID-19  pandemiyasi sababli jahondagi Luvr, Ermitaj, Van Gog, Prado, Salvador Dali kabi yuzlab muzeylar o‘z ekspozitsiyasiga virtual sayohat qilish imkoniyatini yaratib berdi. 

Shu sababli, karantin davrida fuqarolar, ayniqsa, o‘smirlar va yoshlar vaqtini imkon qadar samarali tashkil etish maqsadida O‘zbekiston yoshlar ittifoqi tomonidan Madaniyat vazirligi va Innovatsion rivojlanish vazirligi hamkorligida “Virtual muzey” loyihasi amalga oshirilmoqda, deya xabar qilmoqda Xabardor.uz muxbiri.

Bu orqali ixlosmandlar dunyoning istalgan burchagidan Toshkent shahridagi eng yirik muzeylarga virtual sayohat qilib, mamlakatimizning ulkan tarixi, boy madaniy me’rosi va nodir san’at asarlari bilan tanishish imkoniyatiga ega bo‘ladi.

Ta’kidlanishicha, dastlabki hisob-kitoblarga ko‘ra mazkur loyihani amalga oshirish 468,2 mln.so‘m deb baholangan bo‘lib, Yoshlar ittifoqi a’zolaridan tashkil topgan “Vronica” kompaniyasi bu loyihani “Sahovat va ko‘mak” umumxalq harakati doirasida to‘liq volontyorlik asosida bepul tashkil qilayapti. 

Loyihaga muvofiq, Toshkent shahrida joylashgan jami 28 ta muzey virtual sayohatlarga ixtisoslashgan dunyodagi eng yirik roundme.com platformasi uchun eng zamonaviy IT texnologiyalari va jihozlaridan foydalangan holda, sifat ko‘rsatkichining yangi standarti – 12 K  o‘lchamida, 360º 3D formatida tasvirga olinadi va joylashtiriladi. 

Shuningdek, mamlakat aholisi, ayniqsa, yoshlar uchun qo‘shimcha qulaylik yaratish va internet trafikdan oqilona foydalanish maqsadida TasIX hududida vrmuseum.uz veb-sayti ham ishga tushirildi.

Dastlabki ishlar O‘zbekiston tarixi davlat muzeyi, Temuriylar tarixi davlat muzeyi va O‘zbekiston davlat san’at muzeyida olib borildi. Hozirgi kunda jami 14 ta muzey to‘liq tasvirga olingan bo‘lib, birinchi bosqichda ularning 6 tasi vrmuseum.uz va roundme.com platformalariga joylashtirildi. Ikkinchi bosqichda esa virtual muzeylar soni 20 taga yetkaziladi.

Jumladan, 9 may – Xotira va qadrlash kuniga qadar Qurolli kuchlar muzeyi va Xalqlar do‘stligi maydoniga virtual sayohat qilish imkoniyati yaratiladi.

“Virtual muzey” loyihasini 18 may – Xalqaro muzeylar kuniga qadar to‘liq yakunlash va foydalanishga topshirish rejalashtirilgan.

Eslatib o‘tamiz, bugunga qadar Toshkent shahridagi muzeylar va maydonlardan O‘zbekiston tarixi davlat muzeyi, Temuriylar tarixi davlat muzeyi, O‘zbekiston Davlat san’at muzeyi, O‘zbekiston Amaliy san’at va xunarmandchilik tarixi davlat muzeyi, O‘zbekiston Davlat tabiat muzeyi, va Abdulla Qahhor uy-muzeyi kabilar tasvirga olinib, veb-saytda e’lon qilindi.