Kecha, 8-dekabr kuni O‘zbekiston yoshlar ittifoqi Markaziy Kengashi binosida tashkilot rahbar organi Markaziy Kengash yig‘ilishi o‘tkazildi. Yig‘ilishda qator tashkiliy masalalar ham ko‘rildi.

Hozirgi kungacha Markaziy Kengash raisining birinchi o‘rinbosari - “Yoshlar - kelajagimiz” jamg‘armasi ijro etuvchi direktori lavozimida faoliyat olib borgan Bahrombekov Bunyod Bahrom o‘g‘li va Markaziy Kengash raisi o‘rinbosari – moliya-iqtisod kompleksi rahbari lavozimida faoliyat olib borgan Maqsudov Suxrob Mamirjonovich boshqa ishga o‘tishi munosabati bilan lavozimdan ozod etildi. 

Shu kungacha AT Xalq bankining G‘aznachilik departamenti direktori vazifasida ishlab kelgan Sattarov Xayrulla Fayzullayevich Markaziy Kengash raisining birinchi o‘rinbosari - “Yoshlar - kelajagimiz” jamg‘armasi ijro etuvchi direktori lavozimiga, O‘zbekiston Respublikasi Moliya vazirligi Davlat budjeti bosh boshqarmasining budjet siyosati va konsolidatsiyalashgan budjetni shakllantirish bo‘limi boshlig‘i Xolmuradov Botir Burxanitdinovich Markaziy Kengash raisi o‘rinbosari – moliya-iqtisod kompleksi rahbari lavozimiga saylandi. 

Shuningdek, vakant bo‘lib turgan Markaziy Kengash raisi o‘rinbosari – xalqaro hamkorlik va loyihalar kompleksi rahbari lavozimiga bugungi kunga qadar O‘zbekiston Savdo-sanoat palatasi Tadbirkorlikka o‘qitish va xalqaro mehnat tashkiloti bilan hamkorlik qilish boshqarmasi boshlig‘i Omonov Farruh Farhodjonovich saylandi. 

O‘zbekiston yoshlar ittifoqi jamoaga yangi qo‘shilgan rahbar xodimlarning kelgusi faoliyatida omad va zafarlar tilab qoladi. O‘z navbatida yillar davomida O‘zbekiston yoshlar ittifoqi tizimida samarali faoliyat olib borgan B. Bahrombekov va S. Maqsudovlarga samimiy minnatdorchilik bildirgan holda, muvaffaqiyat hamisha yor bo‘lishini tilaymiz.