Prezident Shavkat Mirziyoyev Xitoyning Shansi provinsiyasidagi ko‘mir konida yuz bergan portlash oqibatida ko‘plab insonlar halok bo‘lgani va jarohatlangani munosabati bilan XXR Raisi Si Jinpingga hamdardlik yo‘lladi.

Prezident matbuot kotibi ma’lum qilishicha, davlat rahbari halok bo‘lganlarning oila a’zolari va yaqinlariga sabr-toqat, jarohat olganlarga esa tezroq sog‘ayib ketishini tilagan.

Ma’lumotlarga ko‘ra, fojia 22-may kuni mamlakat shimolidagi “Lyushenyuy” ko‘mir konida sodir bo‘lgan. Gaz portlashi oqibatida kamida 90 kishi halok bo‘lgan.

Hodisa vaqtida konda 247 nafar ishchi bo‘lgani aytilmoqda. Xitoy rahbari Si Jinping qutqaruv ishlarini tezlashtirish, hodisani chuqur tergov qilish va aybdorlarni javobgarlikka tortishni talab qilgan.