Toshkent shahar hokimi Jahongir Ortiqxo‘jayev “Toshkent shahrining 12 ta qadimiy darvozasini tiklash va uning joylashgan koordinatalarini tasdiqlash to‘g‘risida”gi qarorni imzoladi. 

Qaror matnida keltirilishicha, hokimlik qoshidagi “Raqamli rivojlanish departamenti” MChJ tomonidan arxiv xaritalarini zamonaviy xaritalarga bog‘lash orqali aniqlangan Toshkent shahrining 12 ta qadimiy darvozalarining koordinatalari tasdiqlangan. 

Shuningdek, qadimiy darvozalarni tiklash va qurish bo‘yicha Toshkent shahar ishchi guruhi tarkibi tasdilandi hamda ularning asosiy vazifalari belgilandi.

Unga ko‘ra, ishchi guruh:
–  uch oy muddatda qadimiy darvozalarning namunaviy loyihalari ishlab chiqiladi;  
–  qadimiy darvozalarni qayta tiklash uchun tasdiqlangan koordinatalarga muvofiq, yaqin bo‘lgan hududlardan yer maydonlari chegeralarini aniqlash va ajratish (obodonlashtirish va turizm infratuzilmalari yaratilishini inobatga olgan holda) yuzasidan takliflar kiritiladi. Bunda hududlardagi bino va yer osti kommunikatsiyalarni ko‘chirish zaruriyati mavjudligini hisobga olinadi;
–  yer maydonlarini tanlashda qadimiy darvozalarni turizm namoyishi obyektlariga kiritish va turistlarni jalb qilish uchun tegishli infrastrukturani joylashtirishni inobatga olinadi;
–  namunaviy loyihalarda tashrif buyuruvchilar uchun darvozalar ko‘rinishiga mos ravishda soyabonlar, o‘rindiqlar va chiqindi tashlash qutilarini o‘rnatish nazarda tutiladi.

Qadimiy darvozalarni qayta tiklash va qurish bo‘yicha buyurtmachi etib – Toshkent shahar hokimligi “Yagona buyurtmachi xizmati” injiniring kompaniyasi belgilanmoqda.

Bosh loyihachi va bosh pudrat tashkilotlari esa qonunchilikda belgilangan tartibda tender (tanlov) o‘tkazish yo‘li bilan aniqlanadi.

Qadimiy darvozalarini qurish ishlarini moliyalashtirish manbalari Xalq deputatlari Toshkent shahar Kengashida ko‘rib chiqiladi.