Toshkent shahar hokimligi nima sababdan issiqlik ta’minoti stansiyalari shaharning barcha aholisiga bir xil sifatdagi xizmat ko‘rsata olmasligini ma’lum qildi. 

Bugungi kunda poytaxtdagi 11 ming 141 ta bino markaziy isitish tizimiga ulangan. Bu obyektlarni bahorgi va kuzgi mavsumlarda isitish uchun yiliga 10,68 million gigakaloriya issiqlik energiyasi ishlab chiqariladi va buning uchun bir trillion so‘mdan ortiq mablag‘ sarflanadi. Ishlab chiqarilgan issiqlik energiyasining faqat 59 foizi iste’molchilarga yetib boradi. 

Nosozliklar hamda qurilmalarning ishdan chiqqanligi sababli 414,2 milliard so‘m miqdoridagi xarajat sarf bo‘ladi.Tarmoqda bir necha yildan buyon texnologik yangilash ishlari olib borilmaganligi sababli daromadlarning 85 foizi yoqilg‘i-energetika sarflariga ketadi.

“Toshissiqlikquvvati” DUK mutaxassisining so‘zlariga ko‘ra, poytaxtning markazlashgan isitish tizimi 1970—1980-yillarda qurilgan va o‘shandan buyon yangilanmagan. Shu sababli issiqlikning ma’lum qismi iste’molchiga yetib bormaydi.

Kompaniya bosh muhandisi Aziz Karimbekovning aytishicha, bugungi kunda issiqlik tarmoqlarining 2,7 ming kilometridan 1,9 ming kilometri belgilangan me’yorlardan oshgan vaqt davomida ishlamoqda. Bundan tashqari, ma’nan eskirgan 10 ta katta va 203 ta kichik qozonxona mavjud. Energiya resurslari sarfi va boshqa sabablar tufayli qarzlar mavjud.

Shuningdek, hokimlik yopiq isitish tizimi qanday ishlashi haqida ham ma’lumot berdi. Xususan, issiqlik almashuv qurilmalari har bir uyning yerto‘lasida o‘rnatiladi. Issiqlik markazidan yetkazib beriladigan issiq suvning ma’lum miqdori issiqlik almashuv qurilmasidagi sovuq suvni kerakli haroratgacha isitadi va iste’molchiga yetkazib beradi.
Mutaxassislarning fikricha, bu tizimning ustunligi shundaki, ishlab chiqarilgan issiqlikdan sirkulyatsiya usuli bilan qayta foydalanish mumkin, uning amalda joriy qilinishi esa tabiiy resurslarni o‘rtacha 30 foiz tejashga imkon beradi.

Aziz Karimbekovning ma’lum qilishicha, Jahon banki dasturi asosida Sergeli tumanida ishlar olib borilmoqda. Noyabr oyida dastlabki tenderlar o‘tkaziladi. 2020-yildan boshlab yopiq isitish tizimini joriy qilish boshlanadi. Mirobod va Mirzo Ulug‘bek tumanlarida amalga kiritilishi rejalashtirilayotgan tizim Yevropa tiklanish va taraqqiyot banki mablag‘lari hisobidan moliyalashtiriladi. Bank birinchi va oltinchi issiqlik markazlarini rekonstruksiya qilish uchun 150 million dollar ajratadi. Jahon banki Sergeli tumani uchun 54 million dollar ajratadi.

Poytaxtda yopiq issiqlik tizimini yaratish bo‘yicha sinov loyihasi boshlangan.

Kompaniya bosh muhandisining so‘zlariga ko‘ra, ko‘p qavatli uylarda individual issiqlik punktlari ham o‘rnatiladi. Kelayotgan issiq suv kvartiraga kirib, issiqlik beradi, kvartiradan chiqadi va sirkulyatsion usulda qaytib keladi. Har bir ko‘p qavatli uyda ana shunday sirkulyatsion tizimni ta’minlaydigan nasos stansiyasi o‘rnatiladi. Bu nasos stansiyalari kvartira ichidagi issiq suvni to‘liq aylantiradi va yashovchilarga issiqlikni belgilangan me’yorlar darajasida yetkazib beradi.

Ma’lum bo‘lishicha, noyabr oyida Toshkentda issiqlik energiyasini yopiq tizimga o‘tkazish bo‘yicha ham tender bo‘ladi. Loyiha Yevropa tiklanish va taraqqiyot banki va Osiyo taraqqiyot banki mablag‘lari hisobidan amalga oshiriladi. Shuningdek, Toshkentning issiqlik ta’minoti tizimini uzoq muddatli ijara shartlarida boshqaruvga berish masalalari bo‘yicha fransuz kompaniyasi bilan muzokaralar olib borilmoqda.

Hokimligi tomonidan qayd etilishicha, bu masalada O‘zbekiston tomoni aholi manfaatlariga mos keladigan qulay hamkorlikka erishishni xohlamoqda.