Kechqurun oshxonaga kirgan bekalar uchun eng dahshatlisi bu – stol yoki devorda sayr qilib yurgan suvaraklardir. Jirkanch “hamxonalar”dan qanday qilib qutilish mumkin? Kamiga zararkunandalarga qarshi vosita ham yordam bermasa, kurashning yana qaysi usulini qo‘llasa bo‘ladi? Yarim tunda kayfiyatingizni tushirgan hamda uyqungizni qochirgan hasharotlar ustidan kurashishning yangi turini sinab ko‘rish vaqti kelgandir balki. Quyida bunda nimalar qilish kerakligini o‘rganib oling. 

Xonadonda suvaraklar: Sabab hamda belgilar
Suvaraklarni yo‘q qilishga kirishishdan avval, ular uyingizda nima uchun paydo bo‘lganligini aniqlashga harakat qiling. Bunga bir qancha sabablar mavjud: 
Yuqori namlik va suv. Suvaraklar oziq-ovqatsiz ham yashashi mumkin, ammo suvsiz buning sira iloji yo‘q. Oshxona rakovinasi, hammom yoki hojatxonada muntazam ravishda suv to‘planib turadigan joy bo‘lsa, bu suvaraklarga yaratilgan qulay sharoit bo‘lib xizmat qiladi. 

Ovqat qoldiqlari, burchaklarga sochilgan non ushoqlari, stol yoki pechdagi yog‘ izlari, yuvilmagan idishlar – bularning barchasi suvaraklar ovqatlanishi uchun eng yaxshi variant. Shkafda sochilgan don-u,  chiqindi yig‘ilib yotgan chelakni aytmasa ham bo‘ladi. 

Agar siz ajoyib uy bekasi sifatida tozalikka jiddiy e’tibor qaratsangiz ham suvaraklarga duch kelayotgan bo‘lsangiz, bunda sizning aybingiz yo‘q. Bunda yagona aybdor suvarakli qo‘shnilardir. Bu vaziyatda uyingizdagi har qanday teshik va yoriqlarni berkitishingiz, derazalarga esa maxsus zich to‘qilgan to‘r pardalar o‘rnatishingizga to‘g‘ri keladi. Bunday holda qachongacha yashash mumkin?

Shuningdek, ko‘p qavatli uylarning birinchi qavati savdo do‘koni bo‘lsa, u holda suvaraklar uchun yaxshi zamin yaratilgan, deya hisoblash mumkin. Albatta, hasharotlar hech bo‘lmaganda quvur yo‘lakchalari orqali xonadonma-xonadon “mehmon” bo‘lishadi. 

Suvaraklar ko‘payishida safarga borib-kelish ham sabab bo‘lishi mumkin. Chunki mehmonxona yoki yo‘laklar sanitariya me’yorlariga deyarli amal qilmaydi. Bordi-yu, yuklaringiz orasiga kirib olgan suvaraklardan xabaringiz yo‘q bo‘lsa, uyingizga “ajoyib sovg‘a” bilan tashrif buyurishingiz turgan gap. 

Bilasizmi, barcha narsani sababini bilib, so‘ng oqibatini bartaraf etish osonroq. Agar kichik yoshdagi farzandlaringiz bo‘lsa, shuningdek, uy hayvonlarini ham boqsangiz, suvaraklarga qarshi maxsus dori vositalarini ishlatish muammo tug‘dirishi mumkin. Demak, tabiiy va eng tejamkor usullar sizga yordamga keladi. 

Mo‘ylovli qo‘shnilarga qarshi kurashning eng ko‘p sinalgan usuli – sovuq havo. Bu hasharotlarga salbiy ta’sir qiladi. Masalan, +7 darajada suvaraklar ko‘paymaydi,  -5 darajada esa butunlay qirilib ketadi. 

Sovuq kunlar hasharotlarni yo‘q qilishning ayni vaqti. Ko‘chada harorat  -10 daraja bo‘lganida oshxona, hammom va suvarak bor joylarni tez-tez shamollatib turish kerak. Albatta, bundan so‘ng dushman ustidan g‘alaba qozonishingiz aniq. 

Suvaraklarga qarshi kurashishni aynan tunda boshlang. Buning uchun deraza va eshiklarni tundan-tonggacha ochiq holda qoldiring. Ushbu muzlash jarayonida hasharotlar deyarli qolmaydi. 

Natija siz xohlagandek bo‘lishiga ishonchimiz komil. Hammasini uddasidan chiqqan bo‘lsangiz,  ozoda xonadonda sog‘-salomat yashash baxtini his eting!