AQSHning Kaliforniya shtatidagi San-Diyego okrugida joylashgan masjidda qurolli hujum sodir etildi. NBC News xabariga ko‘ra, voqea oqibatida uch nafar erkak halok bo‘lgan.

Ma’lum qilinishicha, hujumni amalga oshirganlikda gumon qilinayotgan 17 va 18 yoshli ikki o‘smir voqeadan so‘ng masjiddan bir necha kvartal naridagi avtomashina ichida o‘z joniga qasd qilgan. Hodisa nafrat asosida sodir etilgan jinoyat sifatida tergov qilinmoqda.

Qurbonlardan biri masjid qo‘riqchisi bo‘lgan. Politsiya ma’lumotiga ko‘ra, u “yanada kattaroq hujumning oldini olishda hal qiluvchi rol” o‘ynagan.

Matbuot anjumanida aytilishicha, voqeadan biroz avval o‘smirlardan birining onasi politsiyaga murojaat qilib, o‘g‘li, bir nechta qurol va avtomashinasi yo‘qolganini bildirgan.

Hodisaga AQSh prezidenti Donald Tramp munosabat bildirib, otishmani “dahshatli holat” deb atadi va halok bo‘lganlarning yaqinlariga hamdardlik bildirdi.

Shtat gubernatori Gevin Nyusom ham qurbonlar oilalariga ta’ziya izhor qildi.

Mazkur masjid okrugdagi eng yirik islomiy markazlardan biri hisoblanadi. Uning tarkibida Al-Rashid maktabi ham faoliyat yuritadi.