Ҳиндистонда 2022 йил 3 феврал ҳолатига кўра коронавирусдан вафот этганлар сони 500 минг кишидан ошгани айтилмоқда.

Бироқ, баъзи таҳлилчиларнинг таъкидлашича, ҳалок бўлганларнинг умумий сони ҳалиҳануз сир сақланмоқда, яъни, COVID-19 қурбонларининг сони бундан икки баравар кўп. Чунки, пандемия пайтида мамлакатнинг чекка қишлоқларида кўпчилик аҳоли қаровсиз ва ҳимоясиз қолиб кетган. 

Расмий маълумотларга кўра, дунёдаги коронавирусдан ўлганлар сони бўйича Ҳиндистон тўртинчи ўринда туради. Масалан, коронавируснинг биргина “делта” штаммидан вафот этганлар 2021 йилда 400 минг нафарни ташкил этган. Ёки ундан ҳам кўпроқ бўлиши мумкин.

“Science журналидаги тадқиқотимизга кўра, Ҳиндистонда пандемия бошлангандан буён умумий ҳисобда 3 миллион киши касалланиш туфайли  ўлган”, дейди Ҳиндистон менежмент институти доценти Чинмай Тумбе. Аммо ўтган ой ҳукумат ушбу гапларни асоссиз деб топган ва рўйҳат бошқача қайд этилганини айтган.

Шунингдек, мамлакатда кўп ҳолатларда ҳукумат ўлимлар сонини рўйҳатга олишда маъмурий хатолар ва камчиликларга йўл қўйган. Ҳозирда Ҳиндистон коронавируснинг учинчи тўлқини омикронни бошдан кечирмоқда.

Маълум қилинишича, пандемия бошлангандан бери Ҳиндистонда COVID-19 инфекциясидан касалланганларнинг умумий сони 41 миллиондан ошган бўлиб, бу АҚШдан кейинги дунёдаги иккинчи энг юқори кўрсаткичдир.
Таъкидланишича, мамлакатда 939 миллиондан ошиқ фуқарони мажбурий эмлаш жорий этилади. Бу Ҳиндистон аҳолисининг тўртдан уч қисмига тўғри келади.

Бундан ташқари, агарда янги касалланишлар сони кескин пасайган тақдирда, ҳукумат бир қатор чекловларни бекор қилиши ва мактаб, коллеж ва олийгоҳлар феврал ойида қайта очиши мумкин.

• АҚШ
• Ҳиндистон
• коронавирус