Хитой жанубидаги Гуанси провинциясида кучли сув тошқинлари оқибатида илон фермасидан қарийб 900 та илон қочиб кетди. Бу ҳақда The Guardian хабар берди. Маълум қилинишича, “Майсак” тайфуни сабаб юзага келган кучли ёғингарчилик Хенчжоу шаҳридаги Лиулан сув омбори тўғонининг ёрилишига олиб келган. Оқибатда ҳудудни сув босиб, маҳаллий илон фермаси вайрон бўлган. Денгвей қишлоғи қўмитаси раиси У Чжиннинг сўзларига кўра, дастлабки ҳисоб-китобларга биноан, фермадан 800–900 та илон, жумладан заҳарли кобралар, қирол каламуш илонлари ва сув илонлари қочиб кетган.

Ижтимоий тармоқларда тарқалган видеоларда илонларнинг сув босган уйлар ва кўчалар атрофида сузиб юргани акс этган. Айрим маҳаллий ОАВларга кўра, Юнбяо қишлоғида яшовчи бир аёл илон чақиши оқибатида вафот этган. Шунингдек, маҳаллий шифохоналар илон заҳарига қарши зардоб захирасини кўпайтирган.

;Мутахассислар энг катта хавф заҳарли кобралардан эканини таъкидлади. Шу билан бирга, улар узоқ вақт сув остида қолган илонларнинг катта қисми нобуд бўлиши мумкинлигини ҳам қайд этди.