Андижон вилоятининг Асака туманида ўтказилган тезкор тадбирда фуқароларни “Ҳаж” зиёратига юборишни ваъда қилган шахс қўлга олинди.

Бош прокуратура ҳузуридаги Департамент ҳамда бошқа ҳуқуқни муҳофаза қилувчи органлар ҳамкорлигида ўтказилган операция давомида фуқаро М.Ч. икки нафар фуқарони Саудия Арабистонига юборишни ваъда қилиб, бунинг эвазига 18 минг АҚШ доллари талаб қилгани аниқланган. У келишилган маблағнинг 9 минг долларини олаётган вақтида ашёвий далиллар билан ушланган.

Дастлабки маълумотларга кўра, ушбу шахс зиёрат сафарини ноқонуний йўл билан ташкил этишни режалаштирган бўлиши мумкин. Фуқароларнинг ишончидан фойдаланиб, катта миқдорда пул ундиришга уринганлик ҳолати ҳуқуқни муҳофаза қилувчи органлар томонидан ўз вақтида фош этилган.

Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда. Ҳуқуқ-тартибот идоралари фуқароларни бундай ҳолатларда эҳтиёт бўлишга, зиёрат сафарларини фақат расмий ва ишончли ташкилотлар орқали амалга оширишга чақирмоқда.