АҚШ пойтахтида ўтказилган нуфузли White House Correspondents’ Din вақтида кескин ҳолат юз берди. Тадбир Washington Hilton меҳмонхонасида ўтаётган пайтда номаълум шахс ўқ узган.

Воқеага кўра, қуролланган шахс хавфсизлик текширув ҳудудига бостириб кириб, бир неча бор ўт очган. Шу заҳоти махсус хизматлар ишга тушиб, меҳмонлар ва расмийларни зудлик билан эвакуация қилган. Тадбирда иштирок этган Доналд Трамп ҳам рафиқаси билан бирга хавфсиз ҳудудга олиб чиқилган.

Гувоҳларнинг айтишича, зал ичида ваҳима юзага келиб, кўпчилик стол остига яширинишга мажбур бўлган. Бироқ отишма асосан кириш қисми яқинида содир бўлгани сабабли ҳужумчи асосий залга кира олмаган.

Ҳужумчи тез орада қўлга олинган. Ҳодиса оқибатида камида бир нафар хавфсизлик ходими жароҳат олган, аммо оғир талафотлар қайд этилмаган.

Ҳозирда ҳодиса юзасидан тергов ишлари олиб борилмоқда. Дастлабки тахминларга кўра, ҳужумчи ёлғиз ҳаракат қилган.