Миллий статистика қўмитаси маълумотларига кўра, 2026 йил 1 апрель ҳолатига Ўзбекистонда хорижий инвестициялар иштирокидаги жами 19 072 та корхона фаолият юритмоқда.

Таҳлиллар шуни кўрсатадики, хорижий инвесторлар асосан савдо ва саноат йўналишларига устунлик бермоқда. Энг катта улуш савдо соҳасига тўғри келиб, унда 6 814 та корхона фаолият юритмоқда. Саноат йўналишида эса 3 831 та корхона қайд этилган.

Қурилиш соҳаси ҳам инвесторлар эътиборидан четда эмас — бу йўналишда 1 544 та корхона ишламоқда. Ахборот ва алоқа соҳасида 1 488 та корхона фаолият олиб бораётгани эса рақамли иқтисодиётга қизиқиш ортиб бораётганини кўрсатади.

Шунингдек, яшаш ва овқатланиш хизматлари соҳасида 839 та, ташиш ва сақлаш йўналишида 601 та корхона мавжуд. Қишлоқ, ўрмон ва балиқчилик хўжалигида 485 та, соғлиқни сақлаш ва ижтимоий хизматлар соҳасида эса 225 та корхона фаолият юритмоқда. Қолган 3 245 та корхона бошқа йўналишларга тўғри келади.

Умуман олганда, рақамлар хорижий инвесторлар тез даромад келтирувчи ва бозори шаклланган соҳаларни афзал кўраётганини кўрсатмоқда. Шу билан бирга, соғлиқни сақлаш ва қишлоқ хўжалиги каби йўналишларда ҳали катта инвестиция имкониятлари сақланиб қолмоқда.