Бугун, 6 август куни Андижон шаҳрининг Пирмуҳаммедов кўчасида йўл-транспорт ҳодисаси содир бўлди. Андижон вилояти Йўл ҳаракати хавфсизлиги бошқармаси маълумотига кўра, ҳодисада юк машинаси велосипедчини уриб юборган.

Дастлабки маълумотларга кўра, соат 13:00 атрофида 1966 йилда туғилган Х.Ғ. бошқарувидаги Isuzu русумли юк машинаси ҳаракатланиб кетаётган вақтда, ўзи билан бир йўналишда йўлнинг биринчи тасмасида ҳаракатланаётган велосипедчи тўсатдан чап томонга бурилган. Натижада транспорт воситаси велосипед билан тўқнашган.

Ҳодиса оқибатида велосипедчи тан жароҳати олиб, тиббий кўрик ва зарур ёрдам кўрсатиш учун Республика шошилинч тиббий ёрдам илмий марказининг Андижон филиалига мурожаат қилган.

Мазкур йўл-транспорт ҳодисаси юзасидан Андижон шаҳар Ички ишлар бошқармаси Йўл ҳаракати хавфсизлиги бўлими ходимлари томонидан суриштирув ишлари олиб борилмоқда.