Қозоғистоннинг етакчи шахматчиларидан бири Бибисора Асаубаева 46-Бутунжаҳон шахмат олимпиадасида мамлакат аёллар терма жамоасига бошчилик қилади. Бу ҳақда Халқаро шахмат федерацияси (ФИДЕ) маълум қилди.

ФИДЕ эълон қилган таркибга кўра, аёллар ўртасидаги жаҳон рейтингида 5-ўринни эгаллаб турган Асаубаева Самарқандда бўлиб ўтадиган нуфузли мусобақада Қозоғистоннинг асосий умиди сифатида иштирок этади.

Қозоғистон терма жамоаси сафидан, шунингдек, жаҳон қизлар рейтингида 2-ўринни эгаллаб турган Алуа Нурман, 4-ўрин соҳибаси Меруерт Камалиденова, Элназ Калиахмет ва Зарина Нурғалиева ҳам ўрин олган.

Маълумот учун, 46-Бутунжаҳон шахмат олимпиадаси жорий йилнинг 15–27 сентябрь кунлари Самарқанд шаҳрида бўлиб ўтади. FIDE рейтингига кўра, Қозоғистон аёллар терма жамоаси мусобақанинг тўртинчи рақамли жамоаси сифатида баҳоланмоқда.