АҚШнинг Калифорния штатидаги Сан-Диего округида жойлашган масжидда қуролли ҳужум содир этилди. NBC News хабарига кўра, воқеа оқибатида уч нафар эркак ҳалок бўлган.

Маълум қилинишича, ҳужумни амалга оширганликда гумон қилинаётган 17 ва 18 ёшли икки ўсмир воқеадан сўнг масжиддан бир неча квартал наридаги автомашина ичида ўз жонига қасд қилган. Ҳодиса нафрат асосида содир этилган жиноят сифатида тергов қилинмоқда.

Қурбонлардан бири масжид қўриқчиси бўлган. Полиция маълумотига кўра, у “янада каттароқ ҳужумнинг олдини олишда ҳал қилувчи роль” ўйнаган.

Матбуот анжуманида айтилишича, воқеадан бир оз аввал ўсмирлардан бирининг онаси полицияга мурожаат қилиб, ўғли, бир нечта қурол ва автомашинаси йўқолганини билдирган.

Ҳодисага АҚШ президенти Дональд Трамп муносабат билдириб, отишмани “даҳшатли ҳолат” деб атади ва ҳалок бўлганларнинг яқинларига ҳамдардлик билдирди

Штат губернатори Гэвин Ньюсом ҳам қурбонлар оилаларига таъзия изҳор қилди.

Мазкур масжид округдаги энг йирик исломий марказлардан бири ҳисобланади. Унинг таркибида Ал-Рашид мактаби ҳам фаолият юритади.