Халқаро узумчилик ва виночилик ташкилоти (OIV) маълумотига кўра, 2025 йилда бутун дунёда 208 миллион гектолитр вино истеъмол қилинган. Бу кўрсаткич 2024 йилга нисбатан 2,7 фоизга, 2018 йилга нисбатан эса 14 фоизга камдир.

Мутахассислар бунинг асосий сабабларини турмуш тарзидаги ўзгаришлар ва иқтисодий ноаниқлик билан изоҳлашмоқда.

Энг йирик бозорлар — АҚШ, Германия, Франция ва Италияда истеъмол сезиларли даражада камайган. Хитойда эса энг катта пасайиш — 13 фоиз қайд этилган.

Шу билан бирга, Португалия, Бразилия ва Японияда вино истеъмоли ошган.

Экспертларга кўра, токзорлар майдони қисқаришда давом этмоқда, экспорт ҳажми эса сўнгги 15 йилдаги энг паст даражада қолмоқда. Сўнгги 25 йил ичида дунёдаги токзорларнинг 10 фоизи йўқ бўлиб кетган.

Аввалроқ эса ҳар қандай миқдорда алкоголь истеъмоли деменция (ақлий заифлик) хавфини ошириши мумкинлиги ҳақида огоҳлантириш берилган.