OpenAI компанияси ChatGPT платформасига шахсий молияни бошқариш имкониятларини қўшганини маълум қилди.

Янги “Молия” бўлими орқали фойдаланувчилар банк ҳисобларини чат-ботга улаб, даромад ва харажатларини кузатиши, жамғарма ва инвестиция режаларини тузиши мумкин бўлади.

Ҳозирча ушбу функция АҚШдаги айрим Pro обуначилари учун веб-версия ва iOS тизимида синов тариқасида ишга туширилган. Кейинчалик уни Plus фойдаланувчилари учун ҳам очиш режалаштирилмоқда.

OpenAI маълумотига кўра, тизим фойдаланувчининг мақсадлари ва молиявий устуворликлари асосида тавсиялар беради. ChatGPT харажатларни оптималлаштириш, инвестиция хатарларини баҳолаш ҳамда узоқ муддатли молиявий режа тузишда ёрдам бериши мумкин.

Янги хизматда GPT-5.5 модели қўлланилаётгани қайд этилди.

Шунингдек, ChatGPT Plaid платформаси орқали 12 мингдан ортиқ молиявий ташкилотларни қўллаб-қувватлайди. Келгусида Intuit платформаси билан интеграция ҳам йўлга қўйилиши мумкин.

OpenAI фойдаланувчилар маълумотлари хавфсизлиги таъминланишини билдирган. Қайд этилишича, ChatGPT банк ҳисобларидаги маблағларга мустақил кириш ёки улар билан операция амалга ошириш имкониятига эга эмас.