Марказий банк тижорат банклари ва тўлов тизимлари операторларига банкоматлар билан боғлиқ муаммоларни тезкор ҳал қилиш бўйича қатор кўрсатмалар берди.

Қайд этилишича, банк картасидан пул ечилгани ҳолда нақд маблағ берилмаслиги, маблағларнинг кеч қайтарилиши ёки муваффақиятсиз амалиёт учун комиссия ушлаб қолинишига жиддий масала сифатида қаралиши керак.

Шунингдек, мижозларни мурожаат ҳолати ҳақида ўз вақтида хабардор қилмаслик ва масъулиятни бир ташкилотдан бошқасига ўтказиш ҳолатлари танқид қилинди.

Марказий банк банкоматларда юзага келадиган носозликларни тезкор бартараф этиш, маблағларни проактив тарзда қайтариш, эскирган ускуналарни алмаштириш ҳамда хизмат сифатини ошириш бўйича тавсиялар берди.

Маълумотларга кўра, 2026 йил бошида Ўзбекистонда 40 мингдан ортиқ банкомат ва инфокиоск фаолият юритмоқда.