Asus компанияси ўзининг 4G ва 5G Galaxy смартфонлари ҳамда Galaxy Z Flip 5 смартфонидаги симсиз алоқа патентларини бузганликда айблаб, Samsung компаниясини судга берди. Бир ярим йил аввал Asus ҳуқуқшунослари Samsung'дан патентланган технологиядан фойдаланганлик учун лицензия тўловларини тўлашни сўраган, бироқ компания рад жавобини берган. Шу тариқа икки гигант компания ўртасида келишмовчилик юзага келган.

Илгари Asus ўз патентларига эга бўлган “Asus Technology Licencing” ва “Innovative Sonic Limited” компаниясини рўйхатдан ўтказган. Кейин компаниялар “Celerity IP”ни ўзларининг эксклюзив лицензиати этиб тайинладилар ва у Техаснинг Шарқий округида симсиз патент бўйича Samsung'га қарши даъво ариза берди. Унда “симсиз алоқа тизимидаги мослаштирилган ресурсдан фойдаланган ҳолда узатишни яхшилаш усули ва аппарати” тасвирланган.

Стандарт муҳим патентлар бўйича суд жараёни одатда йиллаб давом этади. Агар суд Samsung компаниясига ўзининг интеллектуал мулки учун ҳуқуқ берувчи тўловни тўлашга мажбур қилса, бу компаниянинг смартфон бизнеси учун оғир зарба бўлади. Бироқ компаниялар ҳали ҳам ўзаро лицензия шартномасини тузишлари мумкин.

Маълумот ўрнида, Хитойнинг Huawei ва Xiaomi компаниялари глобал патент бўйича ўзаро лицензия шартномасини тузишган. Шартнома алоқа технологияларини, жумладан, 5G’ни ҳам қамраб олади. Шартнома иккала фирма ўртасидаги патент лицензияси бўйича келишмовчиликни ҳал қилган.

• Android
• Telefon
• лайфхак
• технология