Австралияда 150 йил аввал олинган китоб кутубхонага қайтарилди

Австралияда тахминан 150 йил аввал ўқиш учун олинган китоб кутубхонага қайтарилди. Бу ҳақда Ассоcиатед Пресс хабар берди.

Маълум қилинишича, 1858-йилда нашр этилган “Афина қадимий буюмлари” номли китобни бир эркак уйини таъмирлаш вақтида топиб олган ва уни Киама шаҳридаги кутубхонага топширган.

Кутубхона раҳбари Мишел Ҳадсоннинг айтишича, бу муассасага шу пайтгача ҳеч қачон бунча эски китоб қайтарилмаган.

Ҳисоб-китобларга кўра, агар эски қоидалар амал қилганида, китобни кечиктириб топширганлик учун тахминан 28 минг Австралия доллари миқдорида жарима йиғилган бўларди. Жарима китоб муқовасининг ички қисмида кўрсатилган ҳафтасига 3 пенс тариф асосида ҳисобланган.

Кутубхона ходимлари китобни ким олганини аниқлай олмаган. Чунки 1870-йилларга оид китоб бериш журналлари сақланиб қолмаган. Тахминларга кўра, китоб 1872-йилда кутубхона очилганидан кўп ўтмай йўқолган.

Ўша давр қоидаларига кўра, маст ҳолдаги ташриф буюрувчиларга китоб берилмаган. Шунингдек, бир оилага бериладиган китоблар сони оиладаги саводли аъзолар сонига қараб белгиланган.

Йиллар давомида сақланган китоб намлик сабаб қисман шикастланган. Шу боис у энди ўқувчиларга берилмайди.

“Унинг қайтишини яна 150 йил кутишни истамаймиз”, — дея ҳазиллашди кутубхона раҳбари Мишел Ҳадсон.

Қадимий китоб эндиликда кутубхонанинг маҳаллий тарихий коллексияси таркибида сақланади.