Кичик ёшдаги болаларга қандай мевалар бериш тавсия этилади? Мевалар таркибида витаминлар, минераллар ва бошқа озиқ моддалар мавжуд бўлиб, бу болалар рационининг ажралмас қисми бўлишига асосий сабаб ҳисобланади. 

Фарзандингизга мева беришни қачон бошлашингиз керак? 

Биринчи марта чақалоқ олти ойликдан бошлаб меваларни таътиб кўриши мумкин. Фақат фарзандингизнинг ҳолатини назорат қилган ҳолда ярим чой қошиқ мева пюреси билан бошлашингиз керак. Агар бола реакцияси барқарор бўлса, унда пюре миқдорини аста-секин ошириш мумкин. 

Бир компонентли мева пюрелари болалар учун мос келади ёки хоҳишингизга кўра ўзингиз янги мевалардан пюре тайёрлашингиз мумкин. Биринчи марта истеъмол қилишга яшил олма ёки сариқ нокни танлаганингиз маъқул. Цитрус ва қизил мевалардан қочиш керак.

Бола етти ойлик бўлганидан сўнг данакли меваларга мурожаат қилишингиз мумкин. Масалан, ўрик, шафтоли, олхўри. Лекин уларни ҳам майдалаб бериш тавсия этилади. Бундан ташқари болакай бананни ҳам ёқтириши мумкин, шундай экан уни ҳам синаб кўриш яхши фойда беради. 

Тўққиз ойликдан бошлаб болалар гилос ва қулупнайни бажонидил истеъмол қилади. Бу даврда фарзандингизга ананас ёки киви каби экзотик меваларни беришингиз мумкин. 

Цитрус мевалари эса фақат 11-12 ойликдан бошлаб берилиши тавсия этилади. 

Кичкинтой учун қайси мевалар энг фойдали? Қуйидаги мевалар бола учун фойдалироқ бўлади: 

1. Олма. Бу мева B ва C витаминларига бой бўлиб, таркибида минерал ва озиқ моддалар мавжуд. Олма организмдан токсик моддаларни чиқариб ташлашга ёрдам беради, ошқозон фаолиятини ва иштаҳани яхшилайди. Олма пўстлоғида кўплаб фойдали моддалар мавжуд, шунинг учун боланинг тишлари чиқиши биланоқ, мевани пўстлоғи билан бирга бериш тавсия этилади. 

2. Лимон. Нордон таъми туфайли лимонни боланинг рационига киритиш қийин, аммо унда жуда кўп миқдорда C витамини мавжуд бўлиб, шамоллашга қарши яхши восита ҳисобланади. Лимон туфайли бола мавсумий шамоллаш ва эпидемияларга қарши яхши курашади.

3. Банан. Улар бир ёшгача бўлган болаларнинг рационига қатъий киритилган. Банан темир, магний ва калийга бой. Асаб тизимининг ишини самарали қўллаб-қувватлайди ҳамда эндорфин ишлаб чиқаришга ҳисса қўшади. Агар бола ортиқча вазнга мойил бўлса, банан миқдори чекланиши керак.

4. Апелсин. Иммунитет тизимини мустаҳкамлашга ёрдам беради, витамин етишмаслигида озуқа моддаларини тўлдиради ва инфекцияларга қарши самарали курашади. Апелсин истеъмоли пайтида боланинг ҳолатини кузатиш жуда муҳим ҳисобланади, чунки болаларда цитрус меваларига аллергия кўп кузатилади. 

5. Нок. Нокда кўп миқдорда B витамини, аскорбин кислотаси, калсий, натрий ва темир мавжуд. Шунингдек, у ошқозон яхши ишлашига хизмат қилувчи моддаларни ўз ичига олади. Нокни пишириб, компот ёки ширинликларга қўшиш орқали болага бериш мумкин.  

6. Ананас. Ананас таркибида жуда кўп аскорбин кислотаси мавжуд. Агар бола ортиқча вазндан азият чекса, унда ширинликлар ўрнини ананас билан алмаштириш мумкин. Чунки у ёғларни фаол равишда парчалайди ва овқат ҳазм қилишини яхшилайди. Лекин консерваланган ананасдан воз кечганингиз маъқул, сабаби унинг такибида шакар кўп, бироқ витаминлар кам. 

7. Мандарин. Минераллар ва аминокислоталарга бой мева ҳисобланади. Улар юрак-қон томир ва асаб тизими фаолиятини яхшилайди, болакайни энергия билан таъминлайди, уни диққатли ва эътиборли бўлишига ёрдам беради.

8. Ўрик. Бу мева пектин ва фосфорнинг энг катта манбаи. Ўрик ҳужайралар янгиланишини тезлаштиришга ёрдам беради, ошқозон ости безини барқарорлаштиради ва иммунитетни оширади. Бундан ташқари ўрик таркибидаги озуқавий моддалар боланинг овқат ҳазм қилиш тизимини яхшилайди. Аммо ҳаддан зиёд кўп ўрик истеъмол қилиш диареяга сабаб бўлиши мумкин. Шунинг учун меъёр даражаси билиш муҳим.

Хулоса ўрнида шуни айтиш мумкинки, мевалар боланинг кундалик рационига киритилиши муҳим саналади, чунки улар кўплаб витаминлар ва озуқавий моддаларни ўз ичига олади. Бироқ, уларнинг барчасини боланинг ёшига қараб бериш тавсия этилади. Бундан ташқари, меваларнинг ранг-баранглиги ҳам боланинг иштаҳасига ижобий таъсир кўрсатади ва овқатга бўлган қизиқишини оширади. Шундай экан, фарзандингизни бақувват ва соғлом бўлишини истасангиз унинг кунлик рационини мевалар билан бойитинг.

• Бола
• Мева
• саломатлик